Liber Psalmorum, Salmi 96-98, versae 1-9: Библия онлайн, Nova Vulgata == БИБЛИЯ-ЦЕНТР

Liber Psalmorum, Psalmus 96

¹Cantate Domino canticum novum,
cantate Domino, omnis terra.

²Cantate Domino, benedicite nomini eius,
annuntiate de die in diem salutare eius.

³Annuntiate inter gentes gloriam eius,
in omnibus populis mirabilia eius.

⁴Quoniam magnus Dominus et laudabilis nimis,
terribilis est super omnes deos.

⁵Quoniam omnes dii gentium inania,
Dominus autem caelos fecit.

⁶Magnificentia et pulchritudo in conspectu eius,
potentia et decor in sanctuario eius.

⁷Afferte Domino, familiae populorum,
afferte Domino gloriam et potentiam,

⁸afferte Domino gloriam nominis eius.
Tollite hostias et introite in atria eius,

⁹adorate Dominum in splendore sancto.
Contremiscite a facie eius, universa terra;

¹⁰dicite in gentibus: “ Dominus regnavit! ”.
Etenim correxit orbem terrae, qui non commovebitur;
iudicabit populos in aequitate.

¹¹Laetentur caeli, et exsultet terra,
sonet mare et plenitudo eius;

¹²gaudebunt campi et omnia, quae in eis sunt.
Tunc exsultabunt omnia ligna silvarum

¹³a facie Domini, quia venit,
quoniam venit iudicare terram.
Iudicabit orbem terrae in iustitia
et populos in veritate sua.

Liber Psalmorum, Psalmus 97

¹Dominus regnavit! Exsultet terra,
laetentur insulae multae.

²Nubes et caligo in circuitu eius,
iustitia et iudicium firmamentum sedis eius.

³Ignis ante ipsum praecedet
et inflammabit in circuitu inimicos eius.

⁴Illustrarunt fulgura eius orbem terrae:
vidit et contremuit terra.

⁵Montes sicut cera fluxerunt a facie Domini,
a facie Domini omnis terra.

⁶Annuntiaverunt caeli iustitiam eius,
et viderunt omnes populi gloriam eius.

⁷Confundantur omnes, qui adorant sculptilia,
et qui gloriantur in simulacris suis.
Adorate eum, omnes angeli eius.

⁸Audivit et laetata est Sion,
et exsultaverunt filiae Iudae
propter iudicia tua, Domine.

⁹Quoniam tu Dominus, Altissimus super omnem terram,
nimis exaltatus es super omnes deos.

¹⁰Qui diligitis Dominum, odite malum;
custodit ipse animas sanctorum suorum,
de manu peccatoris liberabit eos.

¹¹Lux orta est iusto,
et rectis corde laetitia.

¹²Laetamini, iusti, in Domino
et confitemini memoriae sanctitatis eius.

Liber Psalmorum, Psalmus 98

¹PSALMUS.
Cantate Domino canticum novum,
quia mirabilia fecit.
Salvavit sibi dextera eius,
et brachium sanctum eius.

²Notum fecit Dominus salutare suum,
in conspectu gentium revelavit iustitiam suam.

³Recordatus est misericordiae suae
et veritatis suae domui Israel.
Viderunt omnes termini terrae
salutare Dei nostri.

⁴Iubilate Deo, omnis terra;
erumpite, exsultate et psallite.

⁵Psallite Domino in cithara,
in cithara et voce psalmi;

⁶in tubis ductilibus et voce tubae corneae,
iubilate in conspectu regis Domini.

⁷Sonet mare et plenitudo eius,
orbis terrarum et qui habitant in eo.

⁸Flumina plaudent manu,
simul montes exsultabunt

⁹a conspectu Domini, quoniam venit iudicare terram.
Iudicabit orbem terrarum in iustitia
et populos in aequitate.


	Благодаря регистрации Вы можете подписаться на рассылку текстов любого из планов чтения Библии Мы планируем постепенно развивать возможности самостоятельной настройки сайта и другие дополнительные сервисы для зарегистрированных пользователей, так что советуем регистрироваться уже сейчас (разумеется, бесплатно).