Canticum Canticorum, Capitoli 2-3, versae 8-5: Библия онлайн, Nova Vulgata == БИБЛИЯ-ЦЕНТР

Canticum Canticorum, Caput 2, versae 8-17

⁸Vox dilecti mei!
Ecce iste venit
saliens in montibus,
transiliens colles.

⁹Similis est dilectus meus capreae
hinnuloque cervorum.
En ipse stat
post parietem nostrum
respiciens per fenestras,
prospiciens per cancellos.

¹⁰En dilectus meus loquitur mihi:
“ Surge, amica mea,
columba mea, formosa mea, et veni.

¹¹Iam enim hiems transiit,
imber abiit et recessit.

¹²Flores apparuerunt in terra,
tempus putationis advenit;
vox turturis audita est
in terra nostra,

¹³ficus protulit grossos suos,
vineae florentes dederunt odorem suum;
surge, amica mea,
speciosa mea, et veni,

¹⁴columba mea, in foraminibus petrae,
in caverna abrupta.
Ostende mihi faciem tuam,
sonet vox tua in auribus meis;
vox enim tua dulcis,
et facies tua decora ”.

¹⁵Capite nobis vulpes, vulpes parvulas,
quae demoliuntur vineas,
nam vineae nostrae florescunt.

¹⁶Dilectus meus mihi, et ego illi,
qui pascitur inter lilia,

¹⁷antequam aspiret dies,
et festinent umbrae.
Revertere; similis esto,
dilecte mi, capreae
hinnuloque cervorum super montes Bether.

Canticum Canticorum, Caput 3, versae 1-5

¹In lectulo meo per noctes
quaesivi, quem diligit anima mea;
quaesivi illum et non inveni.

²“ Surgam et circuibo civitatem;
per vicos et plateas
quaeram, quem diligit anima mea”.
Quaesivi illum et non inveni.

³Invenerunt me vigiles,
qui circumeunt civitatem:
“ Num, quem diligit anima mea, vidistis? ”.

⁴Paululum cum pertransissem eos,
inveni, quem diligit anima mea;
tenui eum nec dimittam,
donec introducam illum in domum matris meae
et in cubiculum genetricis meae.

⁵Adiuro vos, filiae Ierusalem,
per capreas cervasque camporum,
ne suscitetis neque evigilare faciatis dilectam,
donec ipsa velit.


	Благодаря регистрации Вы можете подписаться на рассылку текстов любого из планов чтения Библии Мы планируем постепенно развивать возможности самостоятельной настройки сайта и другие дополнительные сервисы для зарегистрированных пользователей, так что советуем регистрироваться уже сейчас (разумеется, бесплатно).