Liber Psalmorum, Psalmus 97

¹ Psalmus ipsi David.Cantate Domino canticum novum,
quia mirabilia fecit.
Salvavit sibi dextera ejus,
et brachium sanctum ejus.

²Notum fecit Dominus salutare suum;
in conspectu gentium revelavit justitiam suam.

³Recordatus est misericordiæ suæ,
et veritatis suæ domui Israël.
Viderunt omnes termini terræ
salutare Dei nostri.

⁴Jubilate Deo, omnis terra;
cantate, et exsultate, et psallite.

⁵Psallite Domino in cithara;
in cithara et voce psalmi;

⁶in tubis ductilibus, et voce tubæ corneæ.
Jubilate in conspectu regis Domini:

⁷moveatur mare, et plenitudo ejus;
orbis terrarum, et qui habitant in eo.

⁸Flumina plaudent manu;
simul montes exsultabunt

⁹a conspectu Domini:
quoniam venit judicare terram.
Judicabit orbem terrarum in justitia,
et populos in æquitate.


	Благодаря регистрации Вы можете подписаться на рассылку текстов любого из планов чтения Библии Мы планируем постепенно развивать возможности самостоятельной настройки сайта и другие дополнительные сервисы для зарегистрированных пользователей, так что советуем регистрироваться уже сейчас (разумеется, бесплатно).