Liber Ecclesiasticus, Capitoli 39-44, versae 26-18: Библия онлайн, Clementina Vulgata == БИБЛИЯ-ЦЕНТР

Liber Ecclesiasticus, Caput 39, versae 26-41

²⁶Non est dicere: Quid est hoc, aut quid est istud?
omnia enim in tempore suo quærentur.

²⁷Benedictio illius quasi fluvius inundavit.

²⁸Quomodo cataclysmus aridam inebriavit,
sic ira ipsius gentes quæ non exquisierunt eum hæreditabit.

²⁹Quomodo convertit aquas in siccitatem, et siccata est terra,
et viæ illius viis illorum directæ sunt,
sic peccatoribus offensiones in ira ejus.

³⁰Bona bonis creata sunt ab initio:
sic nequissimis bona et mala.

³¹Initium necessariæ rei vitæ hominum, aqua, ignis, et ferrum,
sal, lac, et panis similagineus, et mel,
et botrus uvæ, et oleum, et vestimentum.

³²Hæc omnia sanctis in bona,
sic et impiis et peccatoribus in mala convertentur.

³³Sunt spiritus qui ad vindictam creati sunt,
et in furore suo confirmaverunt tormenta sua.

³⁴In tempore consummationis effundent virtutem,
et furorem ejus qui fecit illos placabunt.

³⁵Ignis, grando, fames, et mors,
omnia hæc ad vindictam creata sunt:

³⁶bestiarum dentes, et scorpii, et serpentes,
et rhomphæa vindicans in exterminium impios.

³⁷In mandatis ejus epulabuntur:
et super terram in necessitatem præparabuntur,
et in temporibus suis non præterient verbum.

³⁸Propterea ab initio confirmatus sum, et consiliatus sum,
et cogitavi, et scripta dimisi.

³⁹Omnia opera Domini bona,
et omne opus hora sua subministrabit.

⁴⁰Non est dicere: Hoc illo nequius est:
omnia enim in tempore suo comprobabuntur.

⁴¹Et nunc in omni corde et ore collaudate,
et benedicite nomen Domini.

Liber Ecclesiasticus, Caput 40

¹ Occupatio magna creata est omnibus hominibus,
et jugum grave super filios Adam,
a die exitus de ventre matris eorum
usque in diem sepulturæ in matrem omnium.
² Cogitationes eorum, et timores cordis,
adinventio exspectationis, et dies finitionis,
³ a residente super sedem gloriosam,
usque ad humiliatum in terra et cinere:
⁴ ab eo qui utitur hyacintho et portat coronam,
usque ad eum qui operitur lino crudo:
furor, zelus, tumultus, fluctuatio, et timor mortis,
iracundia perseverans, et contentio:
⁵ et in tempore refectionis in cubili,
somnus noctis immutat scientiam ejus.
⁶ Modicum tamquam nihil in requie,
et ab eo in somnis, quasi in die respectus.
⁷ Conturbatus est in visu cordis sui,
tamquam qui evaserit in die belli:
in tempore salutis suæ exsurrexit,
et admirans ad nullum timorem:
⁸ cum omni carne, ab homine usque ad pecus,
et super peccatores septuplum.
⁹ Ad hæc mors, sanguis, contentio, et rhomphæa,
oppressiones, fames, et contritio, et flagella:
¹⁰ super iniquos creata sunt hæc omnia:
et propter illos factus est cataclysmus.

¹¹Omnia quæ de terra sunt in terram convertentur,
et omnes aquæ in mare revertentur.

¹²Omne munus et iniquitas delebitur,
et fides in sæculum stabit.

¹³Substantiæ injustorum sicut fluvius siccabuntur,
et sicut tonitruum magnum in pluvia personabunt.

¹⁴In aperiendo manus suas lætabitur:
sic prævaricatores in consummatione tabescent.

¹⁵Nepotes impiorum non multiplicabunt ramos:
et radices immundæ super cacumen petræ sonant.

¹⁶Super omnem aquam viriditas,
et ad oram fluminis ante omne fœnum evelletur.

¹⁷Gratia sicut paradisus in benedictionibus,
et misericordia in sæculum permanet.

¹⁸Vita sibi sufficientis operarii condulcabitur,
et in ea invenies thesaurum.

¹⁹Filii et ædificatio civitatis confirmabit nomen:
et super hæc mulier immaculata computabitur.

²⁰Vinum et musica lætificant cor:
et super utraque dilectio sapientiæ.

²¹Tibiæ et psalterium suavem faciunt melodiam:
et super utraque lingua suavis.

²²Gratiam et speciem desiderabit oculus tuus:
et super hæc virides sationes.

²³Amicus et sodalis in tempore convenientes,
et super utrosque mulier cum viro.

²⁴Fratres in adjutorium in tempore tribulationis:
et super eos misericordia liberabit.

²⁵Aurum et argentum est constitutio pedum:
et super utrumque consilium beneplacitum.

²⁶Facultates et virtutes exaltant cor,
et super hæc timor Domini.

²⁷Non est in timore Domini minoratio:
et non est in eo inquirere adjutorium.

²⁸Timor Domini sicut paradisus benedictionis,
et super omnem gloriam operuerunt illum.

²⁹Fili, in tempore vitæ tuæ ne indigeas:
melius est enim mori quam indigere.

³⁰Vir respiciens in mensam alienam,
non est vita ejus in cogitatione victus:
alit enim animam suam cibis alienis:

³¹vir autem disciplinatus et eruditus custodiet se.

³²In ore imprudentis condulcabitur inopia,
et in ventre ejus ignis ardebit.

Liber Ecclesiasticus, Caput 41

¹ O mors, quam amara est memoria tua
homini pacem habenti in substantiis suis:
² viro quieto, et cujus viæ directæ sunt in omnibus,
et adhuc valenti accipere cibum!
³ O mors, bonum est judicium tuum homini indigenti,
et qui minoratur viribus,
⁴ defecto ætate, et cui de omnibus cura est,
et incredibili, qui perdit patientiam!
⁵ Noli metuere judicium mortis:
memento quæ ante te fuerunt,
et quæ superventura sunt tibi:
hoc judicium a Domino omni carni.
⁶ Et quid superveniet tibi in beneplacito Altissimi?
sive decem, sive centum, sive mille anni:
⁷ non est enim in inferno accusatio vitæ.

⁸Filii abominationum fiunt filii peccatorum,
et qui conversantur secus domos impiorum.

⁹Filiorum peccatorum periet hæreditas,
et cum semine illorum assiduitas opprobrii.

¹⁰De patre impio queruntur filii,
quoniam propter illum sunt in opprobrio.

¹¹Væ vobis, viri impii,
qui dereliquistis legem Domini Altissimi!

¹²Et si nati fueritis, in maledictione nascemini:
et si mortui fueritis, in maledictione erit pars vestra.

¹³Omnia quæ de terra sunt in terram convertentur:
sic impii a maledicto in perditionem.

¹⁴Luctus hominum in corpore ipsorum:
nomen autem impiorum delebitur.

¹⁵Curam habe de bono nomine:
hoc enim magis permanebit tibi
quam mille thesauri pretiosi et magni.

¹⁶Bonæ vitæ numerus dierum:
bonum autem nomen permanebit in ævum.

¹⁷Disciplinam in pace conservate, filii:
sapientia enim abscondita, et thesaurus invisus,
quæ utilitas in utrisque?

¹⁸Melior est homo qui abscondit stultitiam suam,
quam homo qui abscondit sapientiam suam.

¹⁹Verumtamen reveremini in his quæ procedunt de ore meo:

²⁰non est enim bonum omnem reverentiam observare,
et non omnia omnibus bene placent in fide.

²¹Erubescite a patre et a matre de fornicatione:
et a præsidente et a potente de mendacio:

²²a principe et a judice de delicto:
a synagoga et plebe de iniquitate:

²³a socio et amico de injustitia,
et de loco in quo habitas:

²⁴de furto, de veritate Dei, et testamento:
de discubitu in panibus, et ab obfuscatione dati et accepti:

²⁵a salutantibus de silentio,
a respectu mulieris fornicariæ,
et ab aversione vultus cognati.

²⁶Ne avertas faciem a proximo tuo,
et ab auferendo partem et non restituendo.

²⁷Ne respicias mulierem alieni viri,
et ne scruteris ancillam ejus,
neque steteris ad lectum ejus.

²⁸Ab amicis de sermonibus improperii:
et cum dederis, ne improperes.

Liber Ecclesiasticus, Caput 42

¹ Non duplices sermonem auditus de revelatione sermonis absconditi:
et eris vere sine confusione,
et invenies gratiam in conspectu omnium hominum.
Ne pro his omnibus confundaris,
et ne accipias personam ut delinquas:
² de lege Altissimi, et testamento,
et de judicio justificare impium,
³ de verbo sociorum et viatorum,
et de datione hæreditatis amicorum,
⁴ de æqualitate stateræ et ponderum,
de acquisitione multorum et paucorum,
⁵ de corruptione emptionis et negotiatorum,
et de multa disciplina filiorum,
et servo pessimo latus sanguinare.
⁶ Super mulierem nequam bonum est signum.
⁷ Ubi manus multæ sunt, claude:
et quodcumque trades, numera et appende:
datum vero et acceptum omne describe.
⁸ De disciplina insensati et fatui,
et de senioribus qui judicantur ab adolescentibus:
et eris eruditus in omnibus,
et probabilis in conspectu omnium vivorum.

⁹Filia patris abscondita est vigilia,
et sollicitudo ejus aufert somnum:
ne forte in adolescentia sua adulta efficiatur,
et cum viro commorata odibilis fiat:

¹⁰nequando polluatur in virginitate sua,
et in paternis suis gravida inveniatur:
ne forte cum viro commorata transgrediatur,
aut certe sterilis efficiatur.

¹¹Super filiam luxuriosam confirma custodiam,
nequando faciat te in opprobrium venire inimicis,
a detractione in civitate, et objectione plebis,
et confundat te in multitudine populi.

¹²Omni homini noli intendere in specie,
et in medio mulierum noli commorari:

¹³de vestimentis enim procedit tinea,
et a muliere iniquitas viri.

¹⁴Melior est enim iniquitas viri quam mulier benefaciens,
et mulier confundens in opprobrium.

¹⁵Memor ero igitur operum Domini,
et quæ vidi annuntiabo.
In sermonibus Domini opera ejus.

¹⁶Sol illuminans per omnia respexit,
et gloria Domini plenum est opus ejus.

¹⁷Nonne Dominus fecit sanctos enarrare omnia mirabilia sua,
quæ confirmavit Dominus omnipotens stabiliri in gloria sua?

¹⁸Abyssum et cor hominum investigavit,
et in astutia eorum excogitavit.

¹⁹Cognovit enim Dominus omnem scientiam,
et inspexit in signum ævi,
annuntians quæ præterierunt et quæ superventura sunt,
revelans vestigia occultorum.

²⁰Non præterit illum omnis cogitatus,
et non abscondit se ab eo ullus sermo.

²¹Magnalia sapientiæ suæ decoravit,
qui est ante sæculum et usque in sæculum:
neque adjectum est,

²²neque minuitur,
et non eget alicujus consilio.

²³Quam desiderabilia omnia opera ejus!
et tamquam scintilla quæ est considerare!

²⁴Omnia hæc vivunt, et manent in sæculum,
et in omni necessitate omnia obaudiunt ei.

²⁵Omnia duplicia, unum contra unum,
et non fecit quidquam deesse.

²⁶Uniuscujusque confirmavit bona:
et quis satiabitur videns gloriam ejus?

Liber Ecclesiasticus, Caput 43

¹ Altitudinis firmamentum pulchritudo ejus est,
species cæli in visione gloriæ.
² Sol in aspectu annuntians in exitu,
vas admirabile, opus Excelsi.
³ In meridiano exurit terram,
et in conspectu ardoris ejus quis poterit sustinere?
fornacem custodiens in operibus ardoris:
⁴ tripliciter sol exurens montes,
radios igneos exsufflans,
et refulgens radiis suis obcæcat oculos.
⁵ Magnus Dominus qui fecit illum,
et in sermonibus ejus festinavit iter.

⁶Et luna in omnibus in tempore suo,
ostensio temporis, et signum ævi.

⁷A luna signum diei festi:
luminare quod minuitur in consummatione.

⁸Mensis secundum nomen ejus est,
crescens mirabiliter in consummatione.

⁹Vas castrorum in excelsis,
in firmamento cæli resplendens gloriose.

¹⁰Species cæli gloria stellarum:
mundum illuminans in excelsis Dominus.

¹¹In verbis Sancti stabunt ad judicium,
et non deficient in vigiliis suis.

¹²Vide arcum, et benedic eum qui fecit illum:
valde speciosus est in splendore suo.

¹³Gyravit cælum in circuitu gloriæ suæ:
manus Excelsi aperuerunt illum.

¹⁴Imperio suo acceleravit nivem,
et accelerat coruscationes emittere judicii sui.

¹⁵Propterea aperti sunt thesauri,
et evolaverunt nebulæ sicut aves.

¹⁶In magnitudine sua posuit nubes,
et confracti sunt lapides grandinis.

¹⁷In conspectu ejus commovebuntur montes,
et in voluntate ejus aspirabit notus.

¹⁸Vox tonitrui ejus verberavit terram,
tempestas aquilonis, et congregatio spiritus:

¹⁹et sicut avis deponens ad sedendum, aspergit nivem,
et sicut locusta demergens descensus ejus.

²⁰Pulchritudinem candoris ejus admirabitur oculus,
et super imbrem ejus expavescet cor.

²¹Gelu sicut salem effundet super terram:
et dum gelaverit, fiet tamquam cacumina tribuli.

²²Frigidus ventus aquilo flavit,
et gelavit crystallus ab aqua:
super omnem congregationem aquarum requiescet,
et sicut lorica induet se aquis:

²³et devorabit montes, et exuret desertum,
et extinguet viride, sicut igne.

²⁴Medicina omnium in festinatione nebulæ:
et ros obvians ab ardore venienti humilem efficiet eum.

²⁵In sermone ejus siluit ventus,
et cogitatione sua placavit abyssum:
et plantavit in illa Dominus insulas.

²⁶Qui navigant mare enarrent pericula ejus,
et audientes auribus nostris admirabimur.

²⁷Illic præclara opera et mirabilia,
varia bestiarum genera, et omnium pecorum, et creatura belluarum.

²⁸Propter ipsum confirmatus est itineris finis,
et in sermone ejus composita sunt omnia.

²⁹Multa dicemus, et deficiemus in verbis:
consummatio autem sermonum ipse est in omnibus.

³⁰Gloriantes ad quid valebimus?
ipse enim omnipotens super omnia opera sua.

³¹Terribilis Dominus, et magnus vehementer,
et mirabilis potentia ipsius.

³²Glorificantes Dominum quantumcumque potueritis,
supervalebit enim adhuc: et admirabilis magnificentia ejus.

³³Benedicentes Dominum, exaltate illum quantum potestis:
major enim est omni laude.

³⁴Exaltantes eum, replemini virtute, ne laboretis,
non enim comprehendetis.

³⁵Quis videbit eum et enarrabit?
et quis magnificabit eum sicut est ab initio?

³⁶Multa abscondita sunt majora his:
pauca enim vidimus operum ejus.

³⁷Omnia autem Dominus fecit,
et pie agentibus dedit sapientiam.

Liber Ecclesiasticus, Caput 44, versae 1-18

¹ Laudemus viros gloriosos,
et parentes nostros in generatione sua.
² Multam gloriam fecit Dominus:
magnificentia sua a sæculo.
³ Dominantes in potestatibus suis,
homines magni virtute et prudentia sua præditi,
nuntiantes in prophetis dignitatem prophetarum:
⁴ et imperantes in præsenti populo,
et virtute prudentiæ populis sanctissima verba:
⁵ in peritia sua requirentes modos musicos,
et narrantes carmina Scripturarum:
⁶ homines divites in virtute,
pulchritudinis studium habentes,
pacificantes in domibus suis.
⁷ Omnes isti in generationibus gentis suæ gloriam adepti sunt,
et in diebus suis habentur in laudibus.
⁸ Qui de illis nati sunt reliquerunt nomen
narrandi laudes eorum.
⁹ Et sunt quorum non est memoria:
perierunt quasi qui non fuerint:
et nati sunt quasi non nati,
et filii ipsorum cum ipsis.
¹⁰ Sed illi viri misericordiæ sunt,
quorum pietates non defuerunt.
¹¹ Cum semine eorum permanent bona:
¹² hæreditas sancta nepotes eorum,
et in testamentis stetit semen eorum:
¹³ et filii eorum propter illos usque in æternum manent:
semen eorum et gloria eorum non derelinquetur.
¹⁴ Corpora ipsorum in pace sepulta sunt,
et nomen eorum vivit in generationem et generationem.
¹⁵ Sapientiam ipsorum narrent populi,
et laudem eorum nuntiet ecclesia.

¹⁶Enoch placuit Deo, et translatus est in paradisum,
ut det gentibus pœnitentiam.

¹⁷Noë inventus est perfectus, justus,
et in tempore iracundiæ factus est reconciliatio.

¹⁸Ideo dimissum est reliquum terræ,
cum factum est diluvium.


	Благодаря регистрации Вы можете подписаться на рассылку текстов любого из планов чтения Библии Мы планируем постепенно развивать возможности самостоятельной настройки сайта и другие дополнительные сервисы для зарегистрированных пользователей, так что советуем регистрироваться уже сейчас (разумеется, бесплатно).