Liber Psalmorum, Psalmus 11

¹Magistro chori. David.
In Domino confido, quomodo dicitis animae meae:
“ Transmigra in montem sicut passer!

²Quoniam ecce peccatores intenderunt arcum,
paraverunt sagittas suas super nervum,
ut sagittent in obscuro rectos corde.

³Quando fundamenta evertuntur,
iustus quid faciat? ”.

⁴Dominus in templo sancto suo,
Dominus, in caelo sedes eius.
Oculi eius in pauperem respiciunt,
palpebrae eius interrogant filios hominum.

⁵Dominus interrogat iustum et impium;
qui autem diligit iniquitatem, odit anima eius.

⁶Pluet super peccatores carbones ignis et sulphur;
et spiritus procellarum pars calicis eorum.

⁷Quoniam iustus Dominus et iustitias dilexit,
recti videbunt vultum eius.


	Благодаря регистрации Вы можете подписаться на рассылку текстов любого из планов чтения Библии Мы планируем постепенно развивать возможности самостоятельной настройки сайта и другие дополнительные сервисы для зарегистрированных пользователей, так что советуем регистрироваться уже сейчас (разумеется, бесплатно).