РУ

Зарегистрироваться

Войти

Зарегистрироваться

Войти

Найти

Clementina Vulgata (lat)

Вся Библия

Liber Psalmorum

Псалмы 119-133

Liber Psalmorum, Psalmus 119

¹ Canticum graduum.Ad Dominum cum tribularer clamavi,
et exaudivit me.

²Domine, libera animam meam a labiis iniquis
et a lingua dolosa.

³Quid detur tibi, aut quid apponatur tibi
ad linguam dolosam?

⁴Sagittæ potentis acutæ,
cum carbonibus desolatoriis.

⁵Heu mihi, quia incolatus meus prolongatus est!
habitavi cum habitantibus Cedar;

⁶multum incola fuit anima mea.

⁷Cum his qui oderunt pacem eram pacificus;
cum loquebar illis, impugnabant me gratis.

Liber Psalmorum, Psalmus 120

¹ Canticum graduum.Levavi oculos meos in montes,
unde veniet auxilium mihi.

²Auxilium meum a Domino,
qui fecit cælum et terram.

³Non det in commotionem pedem tuum,
neque dormitet qui custodit te.

⁴Ecce non dormitabit neque dormiet
qui custodit Israël.

⁵Dominus custodit te;
Dominus protectio tua super manum dexteram tuam.

⁶Per diem sol non uret te,
neque luna per noctem.

⁷Dominus custodit te ab omni malo;
custodiat animam tuam Dominus.

⁸Dominus custodiat introitum tuum et exitum tuum,
ex hoc nunc et usque in sæculum.

Liber Psalmorum, Psalmus 121

¹ Canticum graduum.Lætatus sum in his quæ dicta sunt mihi:
In domum Domini ibimus.

²Stantes erant pedes nostri
in atriis tuis, Jerusalem.

³Jerusalem, quæ ædificatur ut civitas,
cujus participatio ejus in idipsum.

⁴Illuc enim ascenderunt tribus, tribus Domini:
testimonium Israël,
ad confitendum nomini Domini.

⁵Quia illic sederunt sedes in judicio,
sedes super domum David.

⁶Rogate quæ ad pacem sunt Jerusalem,
et abundantia diligentibus te.

⁷Fiat pax in virtute tua,
et abundantia in turribus tuis.

⁸Propter fratres meos et proximos meos,
loquebar pacem de te.

⁹Propter domum Domini Dei nostri,
quæsivi bona tibi.

Liber Psalmorum, Psalmus 122

¹ Canticum graduum.Ad te levavi oculos meos,
qui habitas in cælis.

²Ecce sicut oculi servorum
in manibus dominorum suorum;
sicut oculi ancillæ
in manibus dominæ suæ:
ita oculi nostri ad Dominum Deum nostrum,
donec misereatur nostri.

³Miserere nostri, Domine, miserere nostri,
quia multum repleti sumus despectione;

⁴quia multum repleta est anima nostra
opprobrium abundantibus, et despectio superbis.

Liber Psalmorum, Psalmus 123

¹ Canticum graduum.Nisi quia Dominus erat in nobis,
dicat nunc Israël,

²nisi quia Dominus erat in nobis:
cum exsurgerent homines in nos,

³forte vivos deglutissent nos;
cum irasceretur furor eorum in nos,

⁴forsitan aqua absorbuisset nos;

⁵torrentem pertransivit anima nostra;
forsitan pertransisset anima nostra
aquam intolerabilem.

⁶Benedictus Dominus, qui non dedit nos
in captionem dentibus eorum.

⁷Anima nostra sicut passer erepta est
de laqueo venantium;
laqueus contritus est,
et nos liberati sumus.

⁸Adjutorium nostrum in nomine Domini,
qui fecit cælum et terram.

Liber Psalmorum, Psalmus 124

¹ Canticum graduum.Qui confidunt in Domino, sicut mons Sion:
non commovebitur in æternum,
qui habitat

²in Jerusalem.
Montes in circuitu ejus;
et Dominus in circuitu populi sui,
ex hoc nunc et usque in sæculum.

³Quia non relinquet Dominus virgam peccatorum
super sortem justorum:
ut non extendant justi
ad iniquitatem manus suas,

⁴benefac, Domine, bonis,
et rectis corde.

⁵Declinantes autem in obligationes,
adducet Dominus cum operantibus iniquitatem.
Pax super Israël!

Liber Psalmorum, Psalmus 125

¹ Canticum graduum.In convertendo Dominus captivitatem Sion,
facti sumus sicut consolati.

²Tunc repletum est gaudio os nostrum,
et lingua nostra exsultatione.
Tunc dicent inter gentes:
Magnificavit Dominus facere cum eis.

³Magnificavit Dominus facere nobiscum;
facti sumus lætantes.

⁴Converte, Domine, captivitatem nostram,
sicut torrens in austro.

⁵Qui seminant in lacrimis,
in exsultatione metent.

⁶Euntes ibant et flebant,
mittentes semina sua.
Venientes autem venient cum exsultatione,
portantes manipulos suos.

Liber Psalmorum, Psalmus 126

¹ Canticum graduum Salomonis.Nisi Dominus ædificaverit domum,
in vanum laboraverunt qui ædificant eam.
Nisi Dominus custodierit civitatem,
frustra vigilat qui custodit eam.

²Vanum est vobis ante lucem surgere:
surgite postquam sederitis,
qui manducatis panem doloris.
Cum dederit dilectis suis somnum,

³ecce hæreditas Domini, filii;
merces, fructus ventris.

⁴Sicut sagittæ in manu potentis,
ita filii excussorum.

⁵Beatus vir qui implevit desiderium suum ex ipsis:
non confundetur cum loquetur inimicis suis in porta.

Liber Psalmorum, Psalmus 127

¹ Canticum graduum.Beati omnes qui timent Dominum,
qui ambulant in viis ejus.

²Labores manuum tuarum quia manducabis:
beatus es, et bene tibi erit.

³Uxor tua sicut vitis abundans
in lateribus domus tuæ;
filii tui sicut novellæ olivarum
in circuitu mensæ tuæ.

⁴Ecce sic benedicetur homo
qui timet Dominum.

⁵Benedicat tibi Dominus ex Sion,
et videas bona Jerusalem omnibus diebus vitæ tuæ.

⁶Et videas filios filiorum tuorum:
pacem super Israël.

Liber Psalmorum, Psalmus 128

¹ Canticum graduum.Sæpe expugnaverunt me a juventute mea,
dicat nunc Israël;

²sæpe expugnaverunt me a juventute mea:
etenim non potuerunt mihi.

³Supra dorsum meum fabricaverunt peccatores;
prolongaverunt iniquitatem suam.

⁴Dominus justus
concidit cervices peccatorum.

⁵Confundantur, et convertantur retrorsum
omnes qui oderunt Sion.

⁶Fiant sicut fœnum tectorum,
quod priusquam evellatur exaruit:

⁷de quo non implevit manum suam qui metit,
et sinum suum qui manipulos colligit.

⁸Et non dixerunt qui præteribant:
Benedictio Domini super vos.
Benediximus vobis in nomine Domini.

Liber Psalmorum, Psalmus 129

¹ Canticum graduum.De profundis clamavi ad te, Domine;

²Domine, exaudi vocem meam.
Fiant aures tuæ intendentes in vocem deprecationis meæ.

³Si iniquitates observaveris, Domine,
Domine, quis sustinebit?

⁴Quia apud te propitiatio est;
et propter legem tuam sustinui te, Domine.
Sustinuit anima mea in verbo ejus:

⁵speravit anima mea in Domino.

⁶A custodia matutina usque ad noctem,
speret Israël in Domino.

⁷Quia apud Dominum misericordia,
et copiosa apud eum redemptio.

⁸Et ipse redimet Israël
ex omnibus iniquitatibus ejus.

Liber Psalmorum, Psalmus 130

¹ Canticum graduum David.Domine, non est exaltatum cor meum,
neque elati sunt oculi mei,
neque ambulavi in magnis,
neque in mirabilibus super me.

²Si non humiliter sentiebam,
sed exaltavi animam meam:
sicut ablactatus est super matre sua,
ita retributio in anima mea.

³Speret Israël in Domino,
ex hoc nunc et usque in sæculum.

Liber Psalmorum, Psalmus 131

¹ Canticum graduum.Memento, Domine, David,
et omnis mansuetudinis ejus:

²sicut juravit Domino;
votum vovit Deo Jacob:

³Si introiero in tabernaculum domus meæ;
si ascendero in lectum strati mei;

⁴si dedero somnum oculis meis,
et palpebris meis dormitationem,

⁵et requiem temporibus meis,
donec inveniam locum Domino,
tabernaculum Deo Jacob.

⁶Ecce audivimus eam in Ephrata;
invenimus eam in campis silvæ.

⁷Introibimus in tabernaculum ejus;
adorabimus in loco ubi steterunt pedes ejus.

⁸Surge, Domine, in requiem tuam,
tu et arca sanctificationis tuæ.

⁹Sacerdotes tui induantur justitiam,
et sancti tui exsultent.

¹⁰Propter David servum tuum
non avertas faciem christi tui.

¹¹Juravit Dominus David veritatem,
et non frustrabitur eam:
De fructu ventris tui
ponam super sedem tuam.

¹²Si custodierint filii tui testamentum meum,
et testimonia mea hæc quæ docebo eos,
et filii eorum usque in sæculum
sedebunt super sedem tuam.

¹³Quoniam elegit Dominus Sion:
elegit eam in habitationem sibi.

¹⁴Hæc requies mea in sæculum sæculi;
hic habitabo, quoniam elegi eam.

¹⁵Viduam ejus benedicens benedicam;
pauperes ejus saturabo panibus.

¹⁶Sacerdotes ejus induam salutari,
et sancti ejus exsultatione exsultabunt.

¹⁷Illuc producam cornu David;
paravi lucernam christo meo.

¹⁸Inimicos ejus induam confusione;
super ipsum autem efflorebit sanctificatio mea.

Liber Psalmorum, Psalmus 132

¹ Canticum graduum David.Ecce quam bonum et quam jucundum,
habitare fratres in unum!

²Sicut unguentum in capite,
quod descendit in barbam, barbam Aaron,
quod descendit in oram vestimenti ejus;

³sicut ros Hermon,
qui descendit in montem Sion.
Quoniam illic mandavit Dominus benedictionem,
et vitam usque in sæculum.

Liber Psalmorum, Psalmus 133

¹ Canticum graduum.Ecce nunc benedicite Dominum, omnes servi Domini:
qui statis in domo Domini,
in atriis domus Dei nostri.

²In noctibus extollite manus vestras in sancta,
et benedicite Dominum.

³Benedicat te Dominus ex Sion,
qui fecit cælum et terram.

Читать далее:Liber Psalmorum, Psalmus 134


	Благодаря регистрации Вы можете подписаться на рассылку текстов любого из планов чтения Библии Мы планируем постепенно развивать возможности самостоятельной настройки сайта и другие дополнительные сервисы для зарегистрированных пользователей, так что советуем регистрироваться уже сейчас (разумеется, бесплатно).