РУ

Зарегистрироваться

Войти

Зарегистрироваться

Войти

Найти

Clementina Vulgata (lat)

Вся Библия

Liber Psalmorum

Псалмы 144-150

Liber Psalmorum, Psalmus 144

¹ Laudatio ipsi David.Exaltabo te, Deus meus rex,
et benedicam nomini tuo in sæculum, et in sæculum sæculi.

²Per singulos dies benedicam tibi,
et laudabo nomen tuum in sæculum, et in sæculum sæculi.

³Magnus Dominus, et laudabilis nimis,
et magnitudinis ejus non est finis.

⁴Generatio et generatio laudabit opera tua,
et potentiam tuam pronuntiabunt.

⁵Magnificentiam gloriæ sanctitatis tuæ loquentur,
et mirabilia tua narrabunt.

⁶Et virtutem terribilium tuorum dicent,
et magnitudinem tuam narrabunt.

⁷Memoriam abundantiæ suavitatis tuæ eructabunt,
et justitia tua exsultabunt.

⁸Miserator et misericors Dominus:
patiens, et multum misericors.

⁹Suavis Dominus universis,
et miserationes ejus super omnia opera ejus.

¹⁰Confiteantur tibi, Domine, omnia opera tua,
et sancti tui benedicant tibi.

¹¹Gloriam regni tui dicent,
et potentiam tuam loquentur:

¹²ut notam faciant filiis hominum potentiam tuam,
et gloriam magnificentiæ regni tui.

¹³Regnum tuum regnum omnium sæculorum;
et dominatio tua in omni generatione et generationem.
Fidelis Dominus in omnibus verbis suis,
et sanctus in omnibus operibus suis.

¹⁴Allevat Dominus omnes qui corruunt,
et erigit omnes elisos.

¹⁵Oculi omnium in te sperant, Domine,
et tu das escam illorum in tempore opportuno.

¹⁶Aperis tu manum tuam,
et imples omne animal benedictione.

¹⁷Justus Dominus in omnibus viis suis,
et sanctus in omnibus operibus suis.

¹⁸Prope est Dominus omnibus invocantibus eum,
omnibus invocantibus eum in veritate.

¹⁹Voluntatem timentium se faciet,
et deprecationem eorum exaudiet, et salvos faciet eos.

²⁰Custodit Dominus omnes diligentes se,
et omnes peccatores disperdet.

²¹Laudationem Domini loquetur os meum;
et benedicat omnis caro nomini sancto ejus in sæculum, et in sæculum sæculi.

Liber Psalmorum, Psalmus 145

¹ Alleluja, Aggæi et Zachariæ.

²Lauda, anima mea, Dominum.
Laudabo Dominum in vita mea;
psallam Deo meo quamdiu fuero.
Nolite confidere in principibus,

³in filiis hominum, in quibus non est salus.

⁴Exibit spiritus ejus, et revertetur in terram suam;
in illa die peribunt omnes cogitationes eorum.

⁵Beatus cujus Deus Jacob adjutor ejus,
spes ejus in Domino Deo ipsius:

⁶qui fecit cælum et terram,
mare, et omnia quæ in eis sunt.

⁷Qui custodit veritatem in sæculum;
facit judicium injuriam patientibus;
dat escam esurientibus.
Dominus solvit compeditos;

⁸Dominus illuminat cæcos.
Dominus erigit elisos;
Dominus diligit justos.

⁹Dominus custodit advenas,
pupillum et viduam suscipiet,
et vias peccatorum disperdet.

¹⁰Regnabit Dominus in sæcula;
Deus tuus, Sion, in generationem et generationem.

Liber Psalmorum, Psalmus 146

¹ Alleluja.Laudate Dominum, quoniam bonus est psalmus;
Deo nostro sit jucunda, decoraque laudatio.

²Ædificans Jerusalem Dominus,
dispersiones Israëlis congregabit:

³qui sanat contritos corde,
et alligat contritiones eorum;

⁴qui numerat multitudinem stellarum,
et omnibus eis nomina vocat.

⁵Magnus Dominus noster, et magna virtus ejus,
et sapientiæ ejus non est numerus.

⁶Suscipiens mansuetos Dominus;
humilians autem peccatores usque ad terram.

⁷Præcinite Domino in confessione;
psallite Deo nostro in cithara.

⁸Qui operit cælum nubibus,
et parat terræ pluviam;
qui producit in montibus fœnum,
et herbam servituti hominum;

⁹qui dat jumentis escam ipsorum,
et pullis corvorum invocantibus eum.

¹⁰Non in fortitudine equi voluntatem habebit,
nec in tibiis viri beneplacitum erit ei.

¹¹Beneplacitum est Domino super timentes eum,
et in eis qui sperant super misericordia ejus.

Liber Psalmorum, Psalmus 147

¹ Alleluja.Lauda, Jerusalem, Dominum;
lauda Deum tuum, Sion.

²Quoniam confortavit seras portarum tuarum;
benedixit filiis tuis in te.

³Qui posuit fines tuos pacem,
et adipe frumenti satiat te.

⁴Qui emittit eloquium suum terræ:
velociter currit sermo ejus.

⁵Qui dat nivem sicut lanam;
nebulam sicut cinerem spargit.

⁶Mittit crystallum suam sicut buccellas:
ante faciem frigoris ejus quis sustinebit?

⁷Emittet verbum suum, et liquefaciet ea;
flabit spiritus ejus, et fluent aquæ.

⁸Qui annuntiat verbum suum Jacob,
justitias et judicia sua Israël.

⁹Non fecit taliter omni nationi,
et judicia sua non manifestavit eis.
Alleluja.

Liber Psalmorum, Psalmus 148

¹ Alleluja.Laudate Dominum de cælis;
laudate eum in excelsis.

²Laudate eum, omnes angeli ejus;
laudate eum, omnes virtutes ejus.

³Laudate eum, sol et luna;
laudate eum, omnes stellæ et lumen.

⁴Laudate eum, cæli cælorum;
et aquæ omnes quæ super cælos sunt,

⁵laudent nomen Domini.
Quia ipse dixit, et facta sunt;
ipse mandavit, et creata sunt.

⁶Statuit ea in æternum, et in sæculum sæculi;
præceptum posuit, et non præteribit.

⁷Laudate Dominum de terra,
dracones et omnes abyssi;

⁸ignis, grando, nix, glacies, spiritus procellarum,
quæ faciunt verbum ejus;

⁹montes, et omnes colles;
ligna fructifera, et omnes cedri;

¹⁰bestiæ, et universa pecora;
serpentes, et volucres pennatæ;

¹¹reges terræ et omnes populi;
principes et omnes judices terræ;

¹²juvenes et virgines; senes cum junioribus,
laudent nomen Domini:

¹³quia exaltatum est nomen ejus solius.

¹⁴Confessio ejus super cælum et terram;
et exaltavit cornu populi sui.
Hymnus omnibus sanctis ejus;
filiis Israël, populo appropinquanti sibi.
Alleluja.

Liber Psalmorum, Psalmus 149

¹ Alleluja.Cantate Domino canticum novum;
laus ejus in ecclesia sanctorum.

²Lætetur Israël in eo qui fecit eum,
et filii Sion exsultent in rege suo.

³Laudent nomen ejus in choro;
in tympano et psalterio psallant ei.

⁴Quia beneplacitum est Domino in populo suo,
et exaltabit mansuetos in salutem.

⁵Exsultabunt sancti in gloria;
lætabuntur in cubilibus suis.

⁶Exaltationes Dei in gutture eorum,
et gladii ancipites in manibus eorum:

⁷ad faciendam vindictam in nationibus,
increpationes in populis;

⁸ad alligandos reges eorum in compedibus,
et nobiles eorum in manicis ferreis;

⁹ut faciant in eis judicium conscriptum:
gloria hæc est omnibus sanctis ejus.
Alleluja.

Liber Psalmorum, Psalmus 150

¹ Alleluja.Laudate Dominum in sanctis ejus;
laudate eum in firmamento virtutis ejus.

²Laudate eum in virtutibus ejus;
laudate eum secundum multitudinem magnitudinis ejus.

³Laudate eum in sono tubæ;
laudate eum in psalterio et cithara.

⁴Laudate eum in tympano et choro;
laudate eum in chordis et organo.

⁵Laudate eum in cymbalis benesonantibus;
laudate eum in cymbalis jubilationis.

⁶Omnis spiritus laudet Dominum!
Alleluja.


	Благодаря регистрации Вы можете подписаться на рассылку текстов любого из планов чтения Библии Мы планируем постепенно развивать возможности самостоятельной настройки сайта и другие дополнительные сервисы для зарегистрированных пользователей, так что советуем регистрироваться уже сейчас (разумеется, бесплатно).