Liber Psalmorum, Psalmus 8

¹ In finem, pro torcularibus. Psalmus David.

²Domine, Dominus noster,
quam admirabile est nomen tuum in universa terra!
quoniam elevata est magnificentia tua super cælos.

³Ex ore infantium et lactentium perfecisti laudem propter inimicos tuos,
ut destruas inimicum et ultorem.

⁴Quoniam videbo cælos tuos, opera digitorum tuorum,
lunam et stellas quæ tu fundasti.

⁵Quid est homo, quod memor es ejus?
aut filius hominis, quoniam visitas eum?

⁶Minuisti eum paulominus ab angelis;
gloria et honore coronasti eum;

⁷et constituisti eum super opera manuum tuarum.

⁸Omnia subjecisti sub pedibus ejus,
oves et boves universas,
insuper et pecora campi,

⁹volucres cæli, et pisces maris
qui perambulant semitas maris.

¹⁰Domine, Dominus noster,
quam admirabile est nomen tuum in universa terra!


	Благодаря регистрации Вы можете подписаться на рассылку текстов любого из планов чтения Библии Мы планируем постепенно развивать возможности самостоятельной настройки сайта и другие дополнительные сервисы для зарегистрированных пользователей, так что советуем регистрироваться уже сейчас (разумеется, бесплатно).